കണ്ണുകൾ അജ്ഞാത

കണ്ണുകൾ അജ്ഞാത സങ്കല്പ ഗന്ധർവ്വ
മന്ദിരത്തിൻ കലാജാലകപാളികൾ
തന്നെ തുറന്നൂ ഹൃദയങ്ങളങ്ങനെ
തമ്മിൽ പുണർന്നൂ ശരമെയ്തു മന്മഥൻ (കണ്ണുകൾ..)

മന്ദസ്മിതങ്ങൾ മനസ്സിലാദ്യം പൂത്ത
വർണ്ണപുഷ്പങ്ങൾ വിരിയുന്ന ചുണ്ടുകൾ
പ്രേമചിത്രങ്ങൾ വരച്ചൂ തളിരിട്ട
രോമഹർഷങ്ങളിൽ സ്വപ്നരേണുക്കളാൽ (കണ്ണുകൾ..)
 
ചക്രവാളത്തിൻ കുടക്കീഴിൽ ആ പ്രേമ-
ചക്രവാകങ്ങൾ രചിച്ച സ്വർഗ്ഗങ്ങളിൽ
മുത്തുച്ചിലമ്പണിഞ്ഞെത്ര നൃത്തം വെച്ചൂ
മുഗ്ദ്ധാനുഭൂതികൾ മാളവകന്യകൾ (കണ്ണുകൾ..)