ആശാമരത്തിന്മേലെ

ആശാമരത്തിന്മേലെ ആകാശക്കൊമ്പില്‍ 
ആലോലം പ്രാവുകള്‍ പാറിപ്പറന്നു 
പാടിത്തുടങ്ങി കന്നിപ്പൂത്തുമ്പികള്‍
തൂവാനില്‍ തിളങ്ങി മുകില്‍ മാലാഖകള്‍ 
സ്നേഹക്കടലിന്‍റെ തിരമാല കൈകോര്‍ക്കയായ്
മോഹക്കരയായ കരയാകെ പറുദീസയായ്   (ആശാമരത്തിന്‍ ) 

ശലോമോന്‍റെ ഗീതത്തില്‍ സംഗീതമൊഴുകി
ശലഭങ്ങള്‍ പൂമെയ്യില്‍ ചുംബിച്ചു മയങ്ങി 
ശരറാന്തല്‍ത്തിരി പോലെ രാത്താരം ചിരിച്ചു 
നഗരം നിലാവിന്‍റെ അള്‍ത്താരയായി 
ഹൃദയം പാടും ഈ സ്വര്‍ഗ്ഗീയ രാവില്‍ 
മൗനം പോലും മെല്ലെ പ്രണയാര്‍ദ്രമായി (ആശാമരത്തിന്‍ )

കുന്തിരിക്കം പുകയുന്ന താഴ്വാരം പൂകാം
ദാവീദിന്‍ കിന്നര മണിവീണ മീട്ടാം
ക്രിസ്മസ് കിനാവിന്‍റെ മധുരങ്ങള്‍ നുണയാം 
കുരുത്തോല പെരുന്നാളില്‍ ഒരുമിച്ചു കൂടാം 
കുന്നിക്കുരുവില്‍ കുഞ്ഞിക്കൂടൊന്നു കൂട്ടാം 
തമ്മില്‍ത്തമ്മില്‍ പ്രണയം കൈമാറിപ്പോകാം (ആശാമരത്തിന്‍ )