ഇനിയുറങ്ങൂ നീലക്കുയിലുകളേ

ഇനിയുറങ്ങൂ നീലക്കുയിലുകളേ
ഇനിയുറങ്ങൂ കുഞ്ഞിക്കുരുവികളേ
ചിരിയൊക്കെ നിർത്തിയല്ലോ ചിലങ്കകളഴിച്ചല്ലോ
കളി നിർത്തിയിളങ്കാറ്റുമുറക്കമായീ - നീല
മുളം കാട്ടിൽ നിഴൽച്ചോട്ടിലുറക്കമായി

(ഇനിയുറങ്ങൂ..)

മാനത്തു മഞ്ചാടിക്കുരു വാരിക്കളിച്ചൊരു
മാമന്റെ മക്കളുറക്കമായീ - മേഘ
മലർമെത്ത നിവർത്തിയിട്ടുറക്കമായീ 

(ഇനിയുറങ്ങൂ..)

കിളിവാതില്‍പ്പുറത്തുള്ള കുളിരണിപ്പൂനിലാവേ
ഒരു തങ്കക്കിനാവായിട്ടോടീ വായോ - എന്റെ
ഓമനക്കുട്ടനുള്ളൊരുമ്മയുമായ് 

(ഇനിയുറങ്ങൂ..)