വേമ്പനാട്

കായലിൽ രൂപപ്പെട്ട  മൂടൽമഞ്ഞ് കാഴ്ചയെ മറയ്ക്കുമ്പോഴും ഒരു മത്സ്യത്തൊഴിലാളി തൻ്റെ വല വീശി മീനിനായി കാത്തിരിക്കുന്നു. വെള്ളത്തിലേക്ക് നോക്കുമ്പോൾ അയാൾ പെട്ടെന്ന് എന്തോ പൊങ്ങിക്കിടക്കുന്നത് കാണുന്നു: നിറമുള്ള ബലൂൺ പോലെ തോന്നിക്കുന്ന എന്തോ ഒന്ന്. വീണ്ടും അതിലേക്കു സൂക്ഷിച്ചു നോക്കിയ അയാൾക്ക്  കൗമാരപ്രായത്തിലുള്ള ഒരു പെൺകുട്ടി വെള്ളത്തിൽ മുങ്ങി താഴുന്നത്  കാണാനായി. അയാൾ വെള്ളത്തിൽ ചാടി പെൺക്കുട്ടിയെ  രക്ഷിച്ച് തൻ്റെ തോണിയിൽ കിടത്തുന്നു.

പെൺകുട്ടിയെ അയാൾ സ്വന്തം വീട്ടിലേക്കു  കൊണ്ടുപോയി പുതിയ വസ്ത്രം നൽകുന്നു. മത്സ്യത്തൊഴിലാളിയുടെ പതിവ് ജീവിതമാണ് പിന്നീട് നമ്മുടെ മുന്നിൽ വരുന്നത്. ചാരായക്കടയിലെ കുടി, അയൽക്കാരന്റെ ഭാര്യയെ കൊതിയോടെ നോക്കുന്നത്, കുടുംബാംഗങ്ങൾക്കൊപ്പമിരുന്ന്  ഭക്ഷണം കഴിക്കുന്നത് ഒക്കെ ഒന്നിനു പിറകെ ഒന്നായി ദൃശ്യങ്ങളായി നമ്മുടെ മുന്നിൽ വരുന്നുണ്ട്.

മറ്റുള്ളവരുമായി ഭക്ഷണം കഴിക്കുമ്പോളും കുടിലിനുള്ളിലുള്ള ആ  പെൺകുട്ടിയുടെ നിശബ്ദരൂപമാണ് അയാളുടെ കണ്ണിൽ വരുന്നത്. രാത്രി ഏറെ വൈകി, ആ ദ്വീപ് ഗാഢനിദ്രയിലായപ്പോൾ, ഭാര്യ ലൈംഗികബന്ധത്തിനു ക്ഷണിക്കുമ്പോൾ അയാളത്  നിരസിക്കുന്നു. ഭാര്യ അതു കാരണം അയാളോട് നീരസം കാണിക്കുന്നു. ഈ സമയത്ത് അവൻ്റെ നിസ്സഹകരണത്തിൻ്റെ കാരണം 
അവൻ്റെ മനസ്സിൽ മകളുടെ പ്രായമുള്ള ആ പെൺക്കുട്ടിയോടുള്ള കാമമാണെന്ന സൂചന നമ്മൾക്ക് നല്കുന്നുണ്ട്.

 പിറ്റേന്ന് രാവിലെ ഭാര്യ പള്ളിയിൽ പോയ സമയം,  ഇളയവൻ ജലപാതയിലൂടെ വല്യ വഞ്ചി കാണാൻ ഓടിപ്പോവുന്ന നേരം അങ്ങനെ കുടുംബം മുഴുവനും പുറത്തായിരിക്കുമ്പോഴാണ് അയാൾ  വീട്ടിലേക്കു വരുന്നത്. അയാൾ അവളെ ലൈംഗികമായി പീഡിപ്പിക്കുന്നു. അവൾ വികാരരഹിതയായി അവനു വഴങ്ങുന്നു.

ഭാര്യയും മക്കളും മടങ്ങി വരുന്നു. പിന്നീട് ആദ്യം കണ്ടതു പോലുള്ള മൂടൽമഞ്ഞ് വീണ്ടും വരുന്നു. നിലാവെളിച്ചം ആ  ദ്വീപിനെ പുല്കുന്ന സമയം  മത്സ്യത്തൊഴിലാളി വള്ളം തുഴയുന്നത് നമ്മൾ കാണുന്നു. ആ വള്ളത്തിൽ അവളുമുണ്ട്.  പെൺകുട്ടി വള്ളത്തിൽ നിന്നും കായലിലേക്ക് ഇറങ്ങുന്നു . മത്സ്യത്തൊഴിലാളി അവളെ ശ്രദ്ധിക്കുന്നു. അവൾ മുങ്ങി മരിക്കുന്നത് അയാൾ ഒരു മയക്കത്തിലെന്ന പോലെ നോക്കിനിൽക്കുന്നു.

മനുഷ്യൻ ഒരു ദ്വീപാണ്, അവന്റെ ദൗർബല്യങ്ങളാലും സങ്കീർണ്ണതകളാലും ചുറ്റപ്പെട്ടിരിക്കുന്ന ഒരു ദ്വീപ്.