മന്ത്രം പോലെ
വിരുത്തം:
നടന്നും, നടന്നേറെത്തളർന്നും, തളർന്നുതെല്ലിരുന്നും
ഇരുന്നിളവേൽക്കവേ ഒരു സ്വപ്നം നുണഞ്ഞും
ഒരു കിളിയൊച്ച കേട്ടുണർന്നും
വീണുടഞ്ഞ മയക്കത്തിൻ വർണ്ണപ്പൊട്ടുകൾ
വാരിയെറിഞ്ഞും സുഖദു:ഖപുണ്യപാപങ്ങൾ
നീളെ വിരിഞ്ഞുനിൽക്കും നീണ്ടവഴികൾ
പദങ്ങളാൽ അളന്നും നിശ്വാസാർദ്രദലങ്ങൾ
വിടർന്നു ഞെട്ടടർന്നും, എന്തോ തേടിത്തേടാതെ
എന്തോ നേടി നേടാതെ
എന്തോ കണ്ടു കാണാതെ
എന്തോ പാടിപ്പാടാതെ
നടന്നുപോമീ യാത്ര അനന്തമോ?
പാട്ട്:
മന്ത്രം പോലെ, മൗനമുടഞ്ഞൊരു
മന്ത്രമുണര്‍ന്നതു പോലേ (2)
ശാന്തസുന്ദരമൊഴുകും പുഴയൊരു
സാന്ത്വനഗീതം പോലേ (മന്ത്രം പോലേ...)
എന്റെ വിഷാദവിഭാതങ്ങളെ നീ
എന്തിനു പാടിയുണര്‍ത്തീ
എന്റെ അനാഥദിനാന്തങ്ങളെ നീ
എന്തിനു പാടിയുറക്കീ (2) (മന്ത്രം പോലേ...)
നൊന്തു പിടഞ്ഞൊരു കിളിയുടെയോമല്‍-
പ്പൊന്‍തൂവലുകള്‍ പോലെ
നിന്‍ കുഞ്ഞലകളിലെന്‍ പകല്‍വെട്ടം
ആ.....ആ,...
നിന്‍ കുഞ്ഞലകളിലെന്‍ പകല്‍വെട്ടം
വര്‍ണ്ണ നുറുങ്ങുകളായീ (മന്ത്രം പോലേ...)
