മതിലുകളിടിയുകയായീ

 

മതിലുകളിടിയുകയായീ പഴയൊരു
ലോകം മറയുകയായീ
മതിലകമൊന്നുയരുകയായീ മണ്ണിൻ
മധുരസ്വപ്നം പോലെ
മണ്ണിൻ സ്വപ്നം പോലെ

ഇരുളിൻ കടവാതിലുകൾ
ഇടമില്ലാതുഴറുമ്പോൾ
പടി തോറും പൂ തൂകി
പകലിൻ പൊൻ വെയിലലകൾ

പ്രാതഃസന്ധ്യ വെളിച്ചത്തിൻ പുതു
ജാലകവാതിൽ തുറന്നു
നീലാകാശം കണ്ടു മദിച്ചൊരു
ശാരിക പാടുകയായീ
പ്രഭാതമേ ഇതിലേ ഇതിലേ
പ്രകാശമേ ഇതിലേ

ഏകാകികളില്ലിനി നാം ഒന്നായ്
തേടിയ തീരത്തണയേ
പാണികൾ കോർക്കുക പാടുക നമ്മുടെ
ഗാനം ഭൂവനം നിറയെ
പ്രഭാതമേ ഇതിലേ ഇതിലേ
പ്രകാശമേ ഇതിലേ