മരണസിംഹാസനം

കഥാനായകനായ കൃഷ്ണന്‍ അവൻ്റെ  ജന്മിക്ക് വേണ്ടി ജോലി ചെയ്യുന്ന ഒരു കര്‍ഷകനാണ്.
ഒരിക്കല്‍ തേങ്ങ മോഷ്ടിച്ചു എന്ന പേരില്‍ കൃഷ്ണന്‍ ജന്മിയുടെ വീട്ടില്‍ വച്ച് പിടിയിലാകുന്നു. 
പിന്നീട് പോലീസ് സ്റ്റേഷനിലേക്ക് കൊണ്ടുപോയ കൃഷ്ണനു മേൽ വർഷങ്ങളായി  തെളിയാതെ കിടന്ന  ഒരു കൊലപാതക കുറ്റം ചുമത്തുന്നു.
പിന്നീട് കോടതിയിൽ ഹാജരാക്കുന്നു. കോടതി അയാളെ വധശിക്ഷക്ക് വിധിക്കുന്നു. 

ഈ സമയത്താണ് അമേരിക്കയിൽ  വധശിക്ഷയ്ക്കായി നൂതനമായി നടപ്പാക്കുന്ന സംവിധാനം വരുന്നത്. ഈ സംവിധാനം മൂലം മരണം  വേദനിയില്ലാതെ നടപ്പാക്കുന്നതിന് വേണ്ടി ഉണ്ടാക്കിയ Electric Chair (മരണസിംഹാസനം)  എന്ന ഉപകരണത്തെ കുറിച്ച് ആ നാട്ടുകാര്‍ കേള്‍ക്കുന്നത്. 
നാട്ടുകാര്‍ ഈ മരണ സിംഹാസനത്തിന്റെ ആദ്യ പരീക്ഷണം കൃഷ്ണനില്‍ നിന്ന് തുടങ്ങുവാന്‍ തീരുമാനിക്കുന്നു, അത് ഇറക്കുമതി ചെയ്യുവാന്‍ അവർ  ഗവണ്മെന്റ്നോട് ആവശ്യപ്പെടുന്നു.

ഒടുവില്‍ ഗവണ്മെന്റ് വഴങ്ങുന്നു, അങ്ങനെ അമേരിക്കക്കാര്‍ ഉണ്ടാക്കിയ മരണ സിംഹാസനത്തിന്റെ  ആദ്യ ഇര കൃഷ്ണന്‍ ആകുന്നു. നാട്ടുകാര്‍ കൃഷ്ണന്റെ ഭാര്യ ചിരുതയെ ആദരിക്കാന്‍ ഒരു മീറ്റിംഗ് വിളിച്ചു കൂട്ടുന്നു. തിരഞ്ഞെടുപ്പു വരുന്ന സമയമായിരുന്നു അത്.  അതിനാൽ കൃഷ്ണൻ്റെ  പ്രതിമ സ്ഥാപിക്കുമെന്ന് വാഗ്‌ദാനം വരെ ഉണ്ടാവുന്നു. മരണ സിംഹാസനത്താല്‍ മരിക്കാന്‍ കഴിഞ്ഞ കൃഷ്ണന്റെ ഭാര്യയായത്‌ തന്റെ ഭാഗ്യമായി കരുതുന്നു എന്ന് ചിരുത പറയുന്നു,അഥവാ അവരെക്കൊണ്ട് പറയിപ്പിക്കുന്നു.

ഇതിനെത്തുടർന്ന്  കേന്ദ്ര മന്ത്രി ലോക ബാങ്കിന്റെ സഹായത്തോടെ എല്ലാ ജില്ലകളിലും ഇത് പോലെയുള്ള മരണസിംഹാസനം സ്ഥാപിക്കാന്‍ ശ്രമിക്കും എന്ന് ആ മീറ്റിംഗില്‍ വച്ച് വാഗ്ദാനം പ്രസ്താവിക്കുന്നു.  നാട്ടുകാർ സന്തോഷത്തോടെ ഈ വാഗ്ദാനത്തെ സ്വീകരിക്കുന്നു.  വൈദ്യുതക്കസേരയിലിരുത്തി ഷോക്കടിപ്പിച്ച് മരണ ശിക്ഷ വിധിക്കുന്ന ഈ പുതിയ  രീതി ആഘോഷമാക്കുന്ന ഒരു ജനതയുടെ  ആഘോഷത്തിന്റെയും അതിൻ്റെ  പിന്നിലെ രാഷ്ട്രീയ നാടകങ്ങളുടെയും ആക്ഷേപഹാസ്യമാണ് സിനിമ അവതരിപ്പിച്ചിരിക്കുന്നത്