കാറ്റ് വിതച്ചവർ

അടിയന്തരാവസ്ഥക്കാലത്തെ, ഇപ്പോഴും പലർക്കും കയ്ക്കുന്ന യാഥാർത്ഥ്യങ്ങളിലേക്ക്‌  ഒരു എത്തിനോട്ടം. ശ്രീ കെ കരുണാകരനു മുഖ്യമന്ത്രി സ്ഥാനം നഷ്ടപ്പെടുത്തിയ, ഉന്നതരായ നാലു പോലീസ് ഉദ്യോഗസ്ഥർ തുറങ്കിലടക്കപ്പെട്ട, കുപ്രസിദ്ധമായ രാജൻ കേസിന്റെ യഥാർത്ഥ ദൃശ്യാവിഷ്കാരം. പോലീസിനെതിരെ പോലീസ് നടത്തിയ അന്വേഷണത്തെ ആസ്പദമാക്കിയുള്ള ഒരു പൊളിറ്റിക്കൽ ക്രൈം ത്രില്ലർ..

ജയറാം പടിക്കൽ എന്ന പോലീസ് ഓഫീസർ തൻ്റെ  MBBS പഠനത്തിനിടക്ക്‌ IPS കരസ്ഥമാക്കിയ യുവ പോലീസ് ഓഫീസർ ആയിരുന്നു. കേരളാ പോലീസിലെ ഏറ്റവും പ്രായം കുറഞ്ഞ DIG എന്ന സ്ഥാനം അദ്ദേഹത്തിനു നേടി കൊടുത്തത് കരുണാകരനോടുള്ള അടുപ്പം ഒന്നു മാത്രം ആയിരുന്നു. ശരീരശാസ്ത്രം നന്നായിഅറിയാമായിരുന്ന ജയറാം പടിക്കൽ കണ്ടു പിടിച്ച ക്രൂരമായ ഒരു മർദ്ദന മുറയായിരുന്നു ഉലക്ക കൊണ്ടുള്ള ഉരുട്ടൽ. ബഞ്ചിൽ മലർത്തി കിടത്തി തുടയുടെ മുകളിൽ നിന്ന് കാൽമുട്ടു വരെ ഉലക്ക കൊണ്ട് ബലമായി ഉരുട്ടും. ഉരുട്ടുമ്പോൾ മൂന്നു രീതിയിൽ മരണം സംഭവിക്കാം. തുടയിലുടെ പോകുന്ന പ്രധാന രക്ത കുഴൽ പൊട്ടി രക്തം വാർന്നു മരിക്കാം, അതി തീവ്ര വേദന സഹിക്കുവാൻ പറ്റാതെ ഹൃദയം പൊട്ടി മരിക്കാം, ഉരുട്ടുമ്പോൾ മസിലുകൾ ചതഞ്ഞ്, മയോഗ്ലോബിൻ എന്ന പ്രൊട്ടീൻ രക്തത്തിൽ കലരുകയും, ആന്തരീകാവയവങ്ങൾ ഒന്നൊന്നായി നിലച്ച് ഇഞ്ചിഞ്ചായിയും മരിക്കാം.