കണ്ണൻ ചിരട്ടയിൽ തീർത്ത

 

കണ്ണൻ ചിരട്ടയിൽ തീർത്ത രൂപങ്ങളേ
കണ്ണഞ്ചും സർഗ്ഗസൗന്ദര്യങ്ങളേ
സൃഷ്ടി തൻ പുസ്തകം നോക്കിപ്പകർത്തിയ
മർത്ത്യമോഹത്തിൻ തിടമ്പുകളേ
ആരുടെയോ കളിപ്പാട്ടങ്ങൾ നിങ്ങൾ
ആരുടെ ഭാവനകൾ  (കണ്ണൻ...)

കണ്ണീർക്കണം പോലെയൊരമ്മയുണ്ടോ
ആ കൈയ്യിലൊരുണ്ണിയുണ്ടോ
അമ്പുറ്റ ക്രൂശിത രൂപമുണ്ടോ
ഒന്നു കുമ്പിട്ടു പ്രാർത്ഥന ചൊല്ലാൻ
ആരുടെ കല്പനാ കൗതുകങ്ങൾ നിങ്ങൾ
ആത്മാവിൻ കീർത്തനങ്ങൾ (കണ്ണൻ...)

മുന്തിരിപ്പാനപാത്രങ്ങളൂണ്ടോ
കുളുർ ചന്ദനക്കിണ്ണമുണ്ടോ
ചന്തമെഴും കളിവീണയുണ്ടോ അതിൻ
തന്ത്രികൾ മീട്ടുവതാരോ
പാവകളോ കളിപ്പാട്ടങ്ങളോ ഇന്നീ
പാവം മനുഷ്യർ നമ്മൾ (കണ്ണൻ..)