എം പ്രതാപ്

പാലക്കാട് സ്വദേശിയായ എം. പ്രതാപ് സിനിമ എന്ന സ്വപ്നത്തെ ഹൃദയത്തോട് ചേർത്ത് പിടിച്ചാണ് 70 കളുടെ തുടക്കത്തിൽ മദിരാശിയിലേക്ക് വണ്ടി കയറുന്നത്. അഭിനയമോഹവുമായി എത്തിയ അദ്ദേഹം ചില മലയാള സിനിമകളിൽ ചെറിയ വേഷങ്ങളിൽ പ്രത്യക്ഷപ്പെട്ടെങ്കിലും നടൻ എന്ന നിലയിൽ ശ്രദ്ധിക്കപ്പെട്ടില്ല. പിന്നീട് സംവിധാന രംഗത്തേക്ക് ചുവടുമാറ്റിയ അദ്ദേഹം ജെ.ഡി. തോട്ടാൻ, ജോഷി തുടങ്ങിയ പ്രമുഖ സംവിധായകരുടെ സഹായിയായി പ്രവർത്തിച്ച് സിനിമയുടെ സാങ്കേതിക വശങ്ങൾ പഠിച്ചെടുത്തു.

1980 ൽ ശോഭ നായികയായ 'ഡാലിയപ്പൂക്കൾ' എന്ന ചിത്രം സംവിധാനം ചെയ്തുകൊണ്ടാണ് അദ്ദേഹം സ്വതന്ത്ര സംവിധായകനായി അരങ്ങേറ്റം കുറിച്ചത്. 'പ്രതാപ് സിങ്' എന്ന പേരായിരുന്നു അന്ന് ഉപയോഗിച്ചിരുന്നത്. നിർമ്മാണത്തിന് ശേഷം കുറേക്കാലം പെട്ടിയിലിരുന്ന സിനിമ റിലീസ് ആയെങ്കിലും പ്രേക്ഷകർക്കിടയിൽ വേണ്ടത്ര ചലനമുണ്ടാക്കിയില്ല. തുടർന്ന് വലിയൊരു ഇടവേള അദ്ദേഹത്തിന്റെ ഔദ്യോഗിക സിനിമാ ജീവിതത്തിൽ സംഭവിച്ചു. എങ്കിലും സിനിമ അദ്ദേഹത്തെ വിട്ടൊഴിഞ്ഞിരുന്നില്ല. ഫിലിം സൊസൈറ്റി പ്രവർത്തനങ്ങളിലും സിനിമാ ഫെസ്റ്റിവലുകളിലും സാംസ്‌കാരിക ചർച്ചകളിലും സജീവമായിരുന്ന അദ്ദേഹം സിനിമാപ്രേമികൾക്ക് സുപരിചിതനായി.

പാലക്കാട്ടുകാരനായിരുന്നുവെങ്കിലും കോഴിക്കോട് ആയിരുന്നു പ്രതാപിന്റെ പ്രവർത്തന തട്ടകം. വെള്ളിമാട്കുന്നിലെ എൻ.ജി.ഒ ക്വാർട്ടേഴ്‌സിലെ ഒരു ചെറിയ മുറിയിൽ ലളിതമായ ജീവിതം നയിച്ച അദ്ദേഹം നീണ്ട പതിനാറ് വർഷങ്ങൾക്ക് ശേഷം 1996 ൽ 'ആകാശത്തെക്കൊരു കിളിവാതിൽ' എന്ന തന്റെ രണ്ടാമത്തെ ചിത്രം സംവിധാനം ചെയ്തു. ഇത്തവണ എം. പ്രതാപ് എന്ന പേരാണ് അദ്ദേഹം സ്വീകരിച്ചത്. എന്നാൽ ആ സിനിമയും സാമ്പത്തികമായി പരാജയപ്പെട്ടു. ഇടക്കാലത്ത് 'നീലാകാശം നിറയെ', 'വരും വരുന്നു വന്നു' തുടങ്ങിയ സിനിമകളിൽ ചീഫ് അസോസിയേറ്റ് ഡയറക്ടറായും അദ്ദേഹം പ്രവർത്തിച്ചു.

ജീവിതത്തിന്റെ പിന്നീടുള്ള ഘട്ടം കടുത്ത പ്രതിസന്ധികൾ നിറഞ്ഞതായിരുന്നു. എൻ.ജി.ഒ ക്വാർട്ടേഴ്‌സിലെ അനധികൃത താമസം ഒഴിപ്പിക്കാൻ സർക്കാർ തീരുമാനിച്ചതോടെ അദ്ദേഹത്തിന് അഭയമില്ലാതായി. തുടർന്ന് ജന്മനാടായ പാലക്കാട്ടേക്ക് മടങ്ങിയ പ്രതാപ്, തന്റെ കുടുംബസ്വത്തിന്റെ വിഹിതം വിറ്റ് കിട്ടിയ തുകയുമായി വീണ്ടും കോഴിക്കോട്ട് എത്തി ഒരു വീടിന് തറക്കല്ലിട്ടു. എന്നാൽ കടബാധ്യതകൾ ഏറുകയും വീടുപണി പൂർത്തിയാക്കാൻ സാധിക്കാതെ വരികയും ചെയ്തതോടെ വാടക വീടുകളിലും ലോഡ്ജുകളിലും അദ്ദേഹത്തിന് അഭയം തേടേണ്ടി വന്നു. ദീദി ദാമോദരന്റെ തിരക്കഥയിൽ ഒരു കുറഞ്ഞ ചിലവിലുള്ള ചിത്രം പ്ലാൻ ചെയ്തെങ്കിലും അതും യാഥാർത്ഥ്യമായില്ല. 

കോവിഡിന് മുൻപ് വരെ സാംസ്കാരിക കൂട്ടായ്മകളിൽ പ്രതാപിന്റെ സാന്നിധ്യം ഉണ്ടായിരുന്നുവെങ്കിലും, ഇപ്പോൾ അദ്ദേഹം എവിടെയാണെന്നോ എന്ത് ചെയ്യുന്നുവെന്നോ ഉള്ള കാര്യത്തിൽ വ്യക്തമായ വിവരങ്ങളില്ല. സിനിമാ മോഹങ്ങൾക്കായി ജീവിതം ഉഴിഞ്ഞുവെച്ച പ്രതാപ് ഒടുവിൽ നിശബ്ദതയിലേക്ക് മറയുകയായിരുന്നു.