കഥകളി കേളി തുടങ്ങി

കഥകളി കേളി തുടങ്ങി നെഞ്ചിൽ
കാഞ്ചന തിരശ്ശീലയനങ്ങി
അരങ്ങത്തു വന്നത് രഘുരാമൻ
സീതാസ്വയംവര നായകൻ (കഥകളി...)

അറുപതു തിരി വിളക്കെരിഞ്ഞു
“കലയ സദാ” പദമുയർന്നു
ഹൃദയങ്ങൾ ശ്രീകോവിൽ നടയായി
പ്രണയോത്സവത്തിന്നിരവായി
അനുഭൂതികളുടെ മണ്ഡപത്തിൽ
ആതിരയായ് തിരുവാതിരയായ് (കഥകളി...)

അനവദ്യഭാവ ഗംഗയൊഴുകീ
അനഘമുഹൂർത്തങ്ങളൊഴുകി
ഉദയത്തിൻ ഗിരിശൃംഗം പൂത്താലോ
മധുരോത്സവമിതു കഴിഞ്ഞാലോ
അനുരാഗാഞ്ജലീ പുഷ്പങ്ങളാൽ
അലങ്കരിക്കാം മനമലങ്കരിക്കാം(കഥകളി...)