ആരിവൻ ആരിവൻ ഉലകം തിരയും
ആരിവൻ ഉലകം തിരയു-
മവൻ ആരെന്നുതിരയുവോ-രിരുളിലലയും!
പാരിടം അടർക്കളം പൊരുതി മരുവും
നര വേട്ട തുടരുമേ..!
തീമൊഴി തീമിഴി മിന്നൽവേഗം
എരി-തീയതിൽ തീയുടൽ കൊണ്ടുലോകം!
ലക്ഷ്യമേ യജ്ഞമായ് ആത്മധീരം
ഇവൻ ജയമായ് പടരുമേ !
അടിതട-വടവുകൾ അറിയും ധീരനോ!
ഞൊടിയിട പടവുകൾ ഉയരും വീരനോ!
തുടുതുടെ തെളിയണ സൂര്യനാളമോ?
അടിമുടി മറയണ മായക്കാരനോ?
അരചന്റെ പടയി-ലുയിർ കൊടുക്കും കാലാൾനീ
അറിവിനാൽ ഉയരെ നഭസ്സേറും വിജ്ഞാനി!
വിതച്ചതാം നിലംകൊയ്യാൻ കൊതിച്ചിടും ഉഴവൻ നീ!
മതവെറി പടപ്പുകൾ-ക്കെതിരാടും നരനും നീ!
മണ്ണിൻ വെളിച്ചങ്ങൾ ഊതിക്കെടുത്തുന്ന
കണ്ണിൻ വെറിതന്നെ കാലവിനാശകം!
പേരിൽ മതത്തിൻ ഗുണത്തെ ഗണിക്കും
പാരിതിലെങ്ങനെ മാനവവിപ്ലവം?
എവിടോ ചിലർ ചെയ്യുന്നതിന്നൊരു-
മതത്തെ മൊത്തവും പ്രതികളാക്കുകിൽ
നീ ഒരുത്തൻ പോരുമിവിടെ
വിധിയെ മാറ്റി ശരിയെ കാട്ടാൻ!
ഞാൻ കരുത്തനെടാ
തീയിൽ കുരുത്തവൻ ഡാ
ഞാൻ മൃഗമാണടാ..
നര ഗർജ്ജനം ഡാ..
മറവിലെ പൊയ്മുഖ-മഴിക്കുന്നതിവനോ
ഇരുളിനെ മുറിയ്ക്കുന്ന കതിരവൻ മകനോ
ഉലകിനെ ദുരിതത്തിൽ തുണയ്ക്കുന്ന നടനോ
ഇവനിവനിവനെന്നാൽ അവൻ താനിവനോ!
ആരിവൻ ആരിവൻ ഉലകം തിരയു-
മവൻ ആരെന്നുതിരയുവോ-രിരുളിലലയും!
പാരിടം അടർക്കളം പൊരുതി മരുവും
നര വേട്ട തുടരുമേ..!!
തീമൊഴി തീമിഴി മിന്നൽവേഗം
എരി-തീയതിൽ തീയുടൽ കൊണ്ടുലോകം!
ലക്ഷ്യമേ യജ്ഞമായ് ആത്മധീരം
ഇവൻ ജയമായ് പടരുമേ !
