യുവഭാരതശിൽപികളേ

യുവഭാരതശിൽപികളേ നവഭാരത ശിൽപികളേ
യുവാക്കളേ യുവതികളേ ജനജീവിത ശിൽപികളേ (യുവഭാരത...)

ചോര തുളുമ്പും കൈയ്യുകളാലീ
ഭാരതസൗധം പണിയുക നാം നവ
ഭാരതസൗധം പണിയുക നാം (യുവഭാരത....)

ഓരോ കുടിലുകൾ തോറും സമത്വ
സൂരജകിരണം പുലരട്ടേ
ഓരോ ചാളയിൽ നിന്നും പട്ടിണിയോടിയൊളിക്കട്ടെ (യുവഭാരത..)

കള്ളപ്പണവും കൊള്ളലാഭവും
കൽത്തുറുങ്കിലിരിക്കട്ടെ
പതിതരായിടും പൗരജനാവലി
പുതുജീവിത സുധ നുകരട്ടെ (യുവഭാരത...)

ഓരോ ഭാരതപ്പൗരനുമീപ്പുതു
പോരിന്നൊരുങ്ങിയിറങ്ങട്ടെ
ഇന്ത്യയിന്ത്യയിന്ത്യയെന്നൊരു
ചിന്തയിൽ മാത്രം പുലരട്ടെ (യുവഭാരത...)