ത്രിസന്ധ്യ

ഇരുട്ടിനും വെളിച്ചത്തിനും മധ്യേ - ഉറൂബിന്റെ ഒരു ചെറുകഥയാണ്. അമ്പതുകൾ മുതൽ ഹിന്ദി സിനിമാലോകത്ത് തിരക്കഥാകൃത്തും സഹസംവിധായകനുമായി പ്രവർത്തിച്ചുവന്നിരുന്ന കണ്ണൂർ സ്വദേശി രാജൻ എന്ന രാജ്മാർബ്രോസ് ഈ കഥയെ ആധാരമാക്കി  1971-72 കാലത്ത് ഹിന്ദിയിലും മലയാളത്തിലുമായി ചിത്രീകരിച്ച ഒരു സിനിമയാണ് ത്രിസന്ധ്യ. മലയാളിയായ ഭാസ്കരനുണ്ണി നായകൻ - ഹിന്ദി നടി വഹീദാറഹ്മാൻ നായിക പിൽക്കാലത്ത് സാത്വിക - പുരോഹിതവേഷങ്ങളിൽ തിളങ്ങിയ PK എബ്രഹാം ആദ്യമായി ക്യാമറയെ അഭിമുഖീകരിച്ചതും ഇതിലായിരുന്നു. ജോൺ എബ്രഹാം ഈ ചിത്രത്തിൽ അഭിനേതാവും സഹസംവിധായകനുമായിരുന്നു. രണ്ട് പാട്ടുകളുള്ള ഈ ചിത്രത്തിന്റെ ഹിന്ദി വെർഷൻ 1974ൽ പുറത്തുവന്നുവെങ്കിലും ചിത്രം മാതൃഭാഷയിൽ റിലീസായതേയില്ല.
പിൽക്കാലത്ത് ജോൺ എബ്രഹാം വിഖ്യാത ചലച്ചിത്രകാരനായി വാഴ്ത്തപ്പെടുകയും പിന്നെ പാതിവഴിയിൽ അരങ്ങൊഴിയുകയും ചെയ്ത വേളയിൽ അദ്ദേഹത്തിന്റെ ആരാധക - അനുയായികൾ ഈ ചിത്രം എവിടുന്നോ കണ്ടെത്തുകയു 1990 നവംബർ 2 ന് ഈചിത്രം തലസ്ഥാനത്ത് ശ്രീതിയേറ്ററിൽ റിലീസ് ചെയ്യുകയും ചെയ്തു.