ചായം പൂശിയ വീട് എന്ന ചലച്ചിത്രത്തിന് സെൻസർ സർട്ടിഫിക്കറ്റ് നൽകുന്ന കാര്യത്തിൽ നിഷേധിച്ചതിനെതുടർന്ന് സെൻട്രൽ ബോർഡ് ഒഫ് സർട്ടിഫിക്കേഷന്റെ തിരുവനന്തപുരം റീജിയണൽ ഓഫീസ് തീരുമാനമെടുക്കണമെന്നും രണ്ടാഴ്ചയ്ക്കുള്ളിൽ തീരുമാനം അറിയിക്കണമെന്നും ഹൈക്കോടതി നിർദ്ദേശിച്ചു. ചിത്രത്തിന് സെൻസർ സർട്ടിഫിക്കറ്റ് നിഷേധിച്ചതിനെതിരെ നിർമ്മാതാക്കളിലൊരാളായ സന്തോഷ് ബാബുസേനൻ നൽകിയ ഹർജിയിൽ ജസ്റ്റിസ് എ. മുഹമ്മദ് മുഷ്താഖാണ് ഈ നിർദ്ദേശം നൽകിയത്.
സിനിമ സെൻസർ സർട്ടിഫിക്കറ്റിനായി സമർപ്പിച്ചപ്പോൾ മൂന്നു രംഗങ്ങളും ഒരു സംഭാഷണവും നീക്കാൻ നിർദ്ദേശിച്ചിരുന്നു. ഈ രംഗങ്ങൾ നീക്കുന്നത് സിനിമയുടെ അടിസ്ഥാന ആശയത്തെ പ്രതികൂലമായി ബാധിക്കുമെന്നാണ് ഹർജിക്കാരന്റെ വാദം. തിരുവനന്തപുരത്ത് നടന്ന ഇരുപതാമത് അന്താരാഷ്ട്ര ചലച്ചിത്രോത്സവത്തിൽ മലയാളത്തിൽ നിന്നുള്ള മത്സര വിഭാഗത്തിൽ ചായം പൂശിയ വീടും ഉൾപ്പെടുത്തിയിരുന്നു.
ചിത്രം തീയേറ്ററിൽ റിലീസായിട്ടില്ല