ഡി എം പൊറ്റെക്കാട്ട്
പൊറ്റെക്കാട്ട് മാമയുടെയും കുഞ്ചിയുടേയും മകനായി 1923 ഡിസംബർ 28 ആം തിയതി തൃശൂർ ജില്ലയിലെ എടത്തിരുത്തിയിലെ പൈനൂരിലാണ് ദാമോദര മാമ പൊറ്റെക്കാട്ട് എന്ന ഡി എം പൊറ്റെക്കാട് ജനിച്ചത്.
പഠനശേഷം ഇന്ത്യൻ ആർമിയിൽ ചേരുകയും കുറച്ചു നാളത്തെ സർവിസിന് ശേഷം ശ്രീലങ്കയിൽ പോവുകയും സിലോൺ നേവിയിൽ ജോലിക്ക് കയറുകയുമുണ്ടായി. അവിടെ വെച്ച് എ കെ ജി യുമായി സൗഹൃദം സ്ഥാപിച്ച ഇദ്ദേഹം പിന്നീട് എ കെ ജിയുടെ പ്രൈവറ്റ് സെക്രട്ടറി ആയി കുറച്ചു നാൾ ജോലി ചെയ്തു. തിരിച്ച് നാട്ടിലെത്തിയ അദ്ദേഹം കമ്മ്യുണിസ്റ്റ് പാർട്ടിയിൽ ചേർന്ന് പ്രവർത്തിച്ചു. 1953 ഡിസംബർ 8 ആം തിയതി 'നിങ്ങൾ എന്നെ കമ്മ്യുണിസ്റ്റാക്കി' എന്ന നാടകം കൊല്ലം ചവറയിൽ ഉദ്ഘാടനം ചെയ്തത് ഇദ്ദേഹമായിരുന്നു.
ദേശാഭിമാനി പത്രാധിപസമിതി അംഗം ആയി പ്രവർത്തിക്കവേ അദ്ദേഹം 1966 ൽ ചങ്ങമ്പുഴയുടെ 'രമണൻ' എന്ന കവിത ആസ്പദമാക്കി സിനിമാസംവിധാന പ്രവർത്തനങ്ങൾക്ക് തുടക്കം കുറിച്ചു. 1967 ൽ റിലീസ് ചെയ്ത ഈ ചിത്രത്തിന്റെ നിർമ്മാണവും തിരക്കഥയും സംവിധാനവും ഇദ്ദേഹം തന്നെയായിരുന്നു. തുടർന്ന് 1971 ൽ
ചങ്ങമ്പുഴയുടെ 'കളിത്തോഴി' എന്ന കൃതിയും ഇദ്ദേഹം സംവിധാനം ചെയ്തു. ഇതിന്റെ നിർമ്മാണവും തിരക്കഥയും ഇദ്ദേഹം തന്നെ ആയിരുന്നു.
1971 നവംബർ 11 ആം തിയതി തന്റെ 48 ആം വയസ്സിൽ മദ്രാസിൽ വെച്ച് കാൻസർ മൂലം അന്തരിച്ച ഇദ്ദേഹത്തിന്റെ മറ്റു കൃതികൾ മുക്തി യുദ്ധം, ചോരക്കണങ്ങൾ, കന്നിമണ്ണ്, ഇതും പ്രേമമാണ്, മരിക്കാൻമേല
തുടങ്ങിവയാണ്.