തങ്കക്കിരീടം ചൂടിയ

തങ്കക്കിരീടം ചൂടിയ മംഗള
സന്ധ്യ നമ്മെയെതിരേറ്റു
നിന്റെ വാർമുടിമുകിലിൽ സുന്ദരി
സ്വർണ്ണപൂമ്പൊടി വർഷിച്ചു (തങ്കക്കിരീടം...)

സ്വപ്നലോലുപ നീയെനിക്കേകിയ
കല്പനാപുഷ്പകത്തിൽ ഞാൻ പറന്നു
രാഗവിരഹിണീ വീണയാം നിന്നിലെ
നാദമായ് ഞാനിതാ തിരിച്ചു വന്നു (തങ്കക്കിരീടം...)

നൃത്തഗായകൻ ആവണിത്തെന്നലീ
പുഷ്പിണീ മണ്ഡപത്തിൻ നട തുറന്നു
ഗാനസരസ്വതീ കോവിലാം നിന്നിലെ
ദേവനായ് ഞാനിതാ തിരിച്ചു വന്നൂ (തങ്കക്കിരീടം..)