കാൽച്ചിലമ്പൊലി തൂവുകെൻ

കാർമുകില്പട്ടുറുമാലിലേതൊരു
കാമിനി തൻ മിഴിനീർമലർ തുന്നി നീ
നൃത്തലോലയാം മാളവകന്യ തൻ
കാൽത്തളിരിൽ ചിലങ്കകൾ ചാർത്തി നീ
(കാൽച്ചിലമ്പൊലി....)
മഞ്ഞുമാമല പോറ്റിയ തയ്യലിൻ
നെഞ്ഞിലെ സ്നേഹയജ്ഞത്തെ വാഴ്ത്തി നീ
നാകവാടിക ചൂടിയൊരുർവശി
രാഗസൂനമീ മണ്ണിൽ പതിക്കവേ
സ്വപ്നതല്പമൊരുക്കിയ ഭൂമി തൻ
അത്ഭുതസ്നേഹദീപ്തിയെ വാഴ്ത്തി നീ
മാനോടോത്തു വളർന്നു ശകുന്തള
താമരത്തളിർത്താളിലെഴുതിയ
പ്രേമഗീതമേ തൂവുക തൂവുക
തൂമലർമണമാ വന ജ്യോത്സ്ന പോൽ