ലോ പോയിന്റ്

സത്യ, നഗരത്തിലെ ഏറ്റവും മിടുക്കനായ ക്രിമിനൽ അഡ്വക്കേറ്റ്. ഏറ്റെടുക്കുന്ന കേസുകളിൽ ഒക്കെ വിജയം. നഗരത്തിലെ പ്രമുഖനായ ബിൽഡർ രാമകൃഷ്ണൻ ഒരു കേസുമായി സത്യയെ കാണാനെത്തുന്നു. അയാളുടെ മകൻ അഭയ് ഒരു പെണ്‍കുട്ടിയുമായി പ്രണയത്തിലാവുകയും പിന്നീട് ആ കുട്ടിയെ ചതിക്കുകയും ചെയ്യുന്നു. അവൾ ആത്മഹത്യ ചെയ്യാൻ ശ്രമിക്കുന്നു. ആത്മഹത്യ റിപ്പോർട്ട് ചെയ്തത് രാമകൃഷ്ണന്റെ അളിയൻ ഇൻസ്പെക്ടർ ആയ സ്റ്റേഷനിൽ ആയതിനാൽ സംഭവം കേസാക്കാതെ മാറ്റുന്നു. എന്നാൽ ആ പെണ്‍കുട്ടി, മായ അവനെതിരായ പരാതിയിൽ ഉറച്ച് നിൽക്കുന്നു. രാമകൃഷ്ണൻ സത്യയെ കാണുന്നത് ആ കേസ് ഒത്തു തീർപ്പാക്കാൻ സഹായിക്കണം എന്ന ആവശ്യവുമായായിരുന്നു. സത്യ രാമകൃഷ്ണന്റെ വീട്ടിലെത്തി അഭയിനെ കാണുന്നു. ഒരു കോടി രൂപ നഷ്ടപരിഹാരം നൽകാൻ തയാറായാൽ കേസ് ഒത്തു തീർപ്പാക്കാം എന്ന് സത്യ അവരോട് പറയുന്നു. അവർ അതിനു സമ്മതിക്കുന്നു. സത്യയോട് ആദ്യം അഭയ്‌ സഹകരിക്കുന്നില്ല. പക്ഷേ സത്യയുടെ ചില്ലറ വിരട്ടലിൽ അവൻ വീഴുന്നു.

സത്യ മായയെ കാണാൻ അവളുടെ വീട്ടിൽ എത്തുന്നു. നഷ്ടപരിഹാരത്തിന്റെ കാര്യം സത്യ അവതരിപ്പിക്കുന്നുവെങ്കിലും മായയുടെ അച്ഛൻ സമ്മതിക്കുന്നില്ല. എന്നാൽ ആത്മഹത്യാ ശ്രമം കുറ്റകരമാണെന്നും മായക്കും ശിക്ഷ കിട്ടുമെന്നും സത്യ പറയുന്നതോടെ അയാൾ പാതി സമ്മതിക്കുന്നുവെങ്കിലും മായ സമ്മതിക്കില്ല എന്ന് അയാൾ സത്യയോട് പറയുന്നു. മായയോട് സത്യ സംസാരിക്കുവാൻ ശ്രമിക്കുന്നുവെങ്കിലും അവൾ സഹകരിക്കുന്നില്ല. മായയെ പുറത്തേക്ക് ഒരു ഡ്രൈവിനു കൊണ്ടു പോകാൻ സത്യ അവളുടെ അച്ഛനോട് അനുവാദം ചോദിക്കുന്നു. ആ യാത്രയിൽ സത്യ അവളോട് സംസാരിക്കാൻ ശ്രമിക്കുന്നു. സത്യ അഭയുടെ വക്കീലാണെന്ന് മായ മനസ്സിലാക്കുന്നു. താൻ ഒത്തുതീർപ്പിന് സമ്മതിക്കില്ല എന്ന് മായ സത്യയോട് പറയുന്നു. ഇടക്ക് അവരുടെ വണ്ടി ഒരു അപകടത്തിൽ പെടുന്നു. ആ വഴി വരുന്ന ഒരു ട്രാക്ടറിൽ അവർ യാത്ര തുടരുന്നു. അതിലുണ്ടായിരുന്ന ത്രേസ്യയേയും ചാർലിയേയും അവർ പരിചയപ്പെടുന്നു. ഭാര്യാ-ഭർത്താക്കന്മാരായാണു മായ അവരെ പരിചയപ്പെടുത്തിയത്. അവരുടെ നിർബന്ധത്തിനു വഴങ്ങി മായയും സത്യയും അവരുടെ ഫാമിൽ പോകുന്നു. ചാർലിയുടെ മകൻ അവരുടെ വണ്ടി ശരിയാക്കി നൽകുന്നു.

തുടർന്നുള്ള യാത്രയിൽ സത്യ തന്റെ മൊബൈലിൽ മരിച്ചു പോയ അനുജത്തിയുടെ ഫോട്ടോ മായയെ കാണിക്കുന്നു. സത്യ അവന്റെ കഥ മായയോട് പറയുന്നു. ബിസിനസ്സുകാരായ സത്യയുടെ അച്ഛനും അമ്മയും തമ്മിൽ സ്ഥിരം വഴക്കിട്ടിരുന്നു. സത്യയെ അവർ ഒരിക്കലും ശ്രദ്ധിച്ചിരുന്നില്ല. അവർക്ക് ഒരു കുട്ടി കൂടെ ഉണ്ടാകാൻ പോകുന്നു എന്നറിഞ്ഞപ്പോൾ അവർ ആ കുട്ടിയെ ഒഴിവാക്കാൻ ശ്രമിച്ചു, പക്ഷേ തനിക്കൊരു കൂട്ടു വേണം എന്നാഗ്രഹിച്ച സത്യ, ഫാമിലി ഡോക്ടരുടെ സഹായത്തോടെ ആ കുട്ടിയെ രക്ഷിച്ചു. പിന്നീട് അനുജത്തിയെ നോക്കിയത് സത്യയായിരുന്നു. ഒടുവിൽ അവർ തമ്മിൽ പിരിഞ്ഞപ്പോൾ സത്യയും അനുജത്തിയും   മുത്തച്ഛനും മുത്തശ്ശിയുടേയും ഒപ്പമാണ് വളർന്നത്. നല്ലൊരു ചിത്രകാരിയായ അവൾ ചെറു പ്രായമുള്ളപ്പോൾ തന്നെ  ട്യൂമർ വന്നു മരിച്ചു. അതോടെ ഒറ്റപ്പെട്ടു പോയ സത്യ ആത്മഹത്യയെ കുറിച്ച് ചിന്തിച്ചുവെങ്കിലും അതിൽ നിന്നും പിന്മാറി. എല്ലാരിൽ നിന്നും ഒഴിഞ്ഞു മാറി അനിയത്തിയുടെ ഓർമ്മകളുമായി താൻ കഴിയുകയാണ് എന്ന് സത്യ മായയോട് പറയുന്നു.ഒത്തിരി ജീവിക്കാൻ ആഗ്രഹിച്ച അനുജത്തി ശ്രുതിക്ക് ഈശ്വരൻ ആയുസ്സ് നൽകിയില്ല എന്നും വെറുമൊരു പ്രേമ നൈരാശ്യത്തിന്റെ പേരിൽ ആത്മഹത്യക്ക് ശ്രമിച്ച മായക്ക് അതേ ഈശ്വരൻ ആയുസ്സ് നീട്ടി നൽകി എന്നും സത്യ കുറ്റപ്പെടുത്തുന്നു. സത്യ മായയെ അവളുടെ വീട്ടിലാക്കുന്നു. സത്യയുടെ ജീവിതത്തെ കുറിച്ച് ചിന്തിക്കുന്ന മായ കേസ് ഒത്തു തീർപ്പാക്കാം എന്ന് അയാളെ വിളിച്ച് അറിയിക്കുന്നു. രാമകൃഷ്ണനുമായി മായയുടെ വീട്ടിൽ പോയി സത്യ കേസ് ഒത്തു തീർപ്പാക്കി പണം നൽകുന്നു.