സന്തോഷ് ശിവൻ

Name in English: 
Santhosh Sivan

ഇന്ത്യൻ ചലച്ചിത്ര വേദിയിലെ പ്രശസ്ത ഛായാഗ്രാഹകനും, സംവിധായകനുമാണ് സന്തോഷ് ശിവൻ ASC, ISC. 1964 ഫെബ്രുവരി 8 ന് തിരുവനന്തപുരത്ത് ജനിച്ചു. കലാകാരന്മാരുടെ കുടുംബമായിരുന്നു അദ്ദേഹത്തിന്റേത്. സന്തോഷ് ശിവന്റെ അച്ഛൻ ശിവൻ ഡോക്യൂമെൻട്രി സംവിധായക്നായിരുന്നു. കുട്ടിക്കാലത്തുതന്നെ ചിത്രരചന അഭ്യസിച്ച സന്തോഷ് അതിൽ തന്റെപ്രാഗത്ഭ്യം പ്രകടിപ്പിച്ചിരുന്നു. തിരുവനന്തപുരം ലയോളകോളേജിൽ നിന്നുമാണ് അദ്ദേഹം ബിരുദം നേടിയത്. അതിനുശേഷം Film and Television Institute of India (FTII) യിൽനിന്നും ബിരുദം കരസ്ഥമാക്കി. 

  ഡോക്യൂമെന്റ്രികൾ ഷൂട്ടു ചെയ്യുന്നതിന് സഹായിയായി അച്ഛനോടൊപ്പമുള്ളയാത്രകൾ സന്തോഷ് ശിവനെ ഒരു ഛായാഗ്രാഹകനായി മാറ്റുന്നതിൽ പ്രധാനപങ്കു വഹിച്ചു. സന്തോഷ് ശിവന്റെ സഹോദരൻമാരായ സഞ്ജീവ് ശിവനും, സംഗീത് ശിവനും സിനിമാ സംവിധായകരായിരുന്നു. 1986 ൽ നിധിയുടെ കഥ എന്ന ചിത്രത്തിനു വേണ്ടിയായിരുന്നു സന്തോഷ് ശിവൻ ആദ്യമായി ക്യാമറചലിപ്പിച്ചത്. തുടർന്ന് അൻപതോളം സിനിമകൾ അദ്ദേഹത്തിന്റെ ഛായാഗ്രഹണമികവിൽ പുറത്തിറങ്ങി. നാല്പതിലധികം ഡോക്യൂമെന്റ്രികളും അദ്ദേഹം ചെയ്തിട്ടുണ്ട്. 1990 ലാണ് സന്തോഷ് ശിവന് പെരുന്തച്ചനിലെ ക്യാമറാമികവിന് മികച്ച ഛായഗ്രാഹകനുള്ള ദേശീയ അവാർഡ് ലഭിയ്ക്കുന്നത്. തുടർന്ന് 1996 - കാലാപാനി, 1998 - ഇരുവർ (തമിഴ്), 1999 - ദിൽസേ (ഹിന്ദി) എന്നിവയ്ക്കും ദേശീയ അവാർഡ് ലഭിച്ചു. കൂടാതെ 1991 ൽ നോൺ ഫീച്ചർ ഫിലിം മോഹിനിയാട്ടത്തിനും അദ്ദേഹത്തിന് ദേശീയ അവാർഡ് ലഭിച്ചു. 1992, 1994,1996,2005 വർഷങ്ങളിൽ മികച്ച ഛായാഗ്രാഹകനുള്ള കേരള സംസ്ഥാന ചലച്ചിത്രഅവാർഡ് സന്തോഷ് ശിവന് ലഭിച്ചിട്ടുണ്ട്. 1992, 1996, 2010 വർഷങ്ങളിൽ മികച്ച ഛായാഗ്രാഹകനുള്ള തമിൾനാട്സ്റ്റേറ്റ് അവാർഡും അദ്ദേഹത്തിന് ലഭിച്ചിട്ടുണ്ട്.

  1998 ൽ റിലീസ് ചെയ്ത് ദി ടെററിസ്റ്റ് എന്ന തമിഴ് സിനിമയിലൂടെയാണ് സന്തോഷ് ശിവൻ സംവിധായകനാകുന്നത്. കെയ്റൊ ഫിലിം ഫെസ്റ്റിവലിൽനിന്നും മികച്ച സംവിധായകനും മികച്ച നടിയ്ക്കുമുള്ള അവാർഡ് ടെററിസ്റ്റിനു ലഭിച്ചു. തുടർന്ന് മല്ലി, അശോക, അനന്തഭദ്രം ഉറുമി, ജാക്ക്&ജിൽ എന്നീ സിനിമകളും സംവിധാനം ചെയ്തു. 2008ൽ സന്തോഷ് ശിവൻ പ്രൊഡക്ഷൻ എന്ന പേരിൽ അദ്ദേഹം ഒരു സിനിമാ നിർമ്മാണകമ്പനി രൂപീകരിച്ചു. ആ പ്രൊഡക്ഷൻ കമ്പനി ഡൊക്യുമെൻട്രികളും ഫീച്ചർ ഫിലിമുകളും നിർമ്മിച്ചു വരുന്നു. Indian Society of Cinematographers (ISC)  സ്ഥാപകാംഗം കൂടിയാണ് സന്തോഷ് ശിവൻ. ഏഷ്യാ ഫസഫിക് മേഖലയിൽനിന്നും  American Society of Cinematographers (ASC) ൽ അംഗമായ ആദ്യത്തെ ആളാണ് സന്തോഷ് ശിവൻ. ഇന്ത്യൻ സിനിമയ്ക്കുനൽകിയ സംഭാവനയെ പരിഗണിച്ച് 2014ൽ സന്തോഷ് ശിവന് പത്മശ്രീ ലഭിച്ചിട്ടുണ്ട്.

1993 ലാണ് സന്തോഷ് ശിവൻ വിവാഹിതനായത്. ഭാര്യ ദീപ.