ബാബു ആന്റണി

Name in English: 
Babu Antony

മലയാള ചലച്ചിത്ര നടൻ. ടി ജെ ആന്റണിയുടെയും മറിയം ആന്റണിയുടെയും മകനായി കോട്ടയം ജില്ലയിലെ പൊങ്കുന്നത്ത് ജനിച്ചു. ബാബു ആന്റണിയുടെ പ്രാഥമിക വിദ്യാഭ്യാസം സേക്രട് ഹാർട്ട് ഹൈസ്കൂൾ, പൊൻകുന്നം ഗവണ്മെന്റ് ഹൈസ്കൂൾ, സെന്റ് ഡൊമിനിക് ഹൈസ്കൂൾ കാഞ്ഞിരപ്പള്ളി എന്നീ സ്കൂളുകളിൽ നിന്നായിരുന്നു. വിദ്യാഭ്യാസകാലത്ത് ബാബു ആന്റണി നല്ലൊരു അത്ലറ്റ് ആയിരുന്നു. ട്രിപ്പിൾ ജമ്പ്, ഹൈ ജമ്പ്, ലോങ് ജമ്പ്, പോൾവാൾട്ട്, 800 മീറ്റർ റിലെ, വോളിബാൾ എന്നിവയിൽ കേരളത്തെ പ്രതിനിധീകരിച്ച് പങ്കെടുത്തിട്ടുണ്ട്. പൂനെ കോളേജിൽ നിന്നും ഇംഗ്ലീഷ് സാഹിത്യത്തിൽ ബിരുദം നേടിയ ബാബു ആന്റ്ണി, ഹൂമൺ റിസോൾസ് മാനേജ്മെന്റിൽ മാസ്റ്റേൾസ് ഡിഗ്രി കഴിഞ്ഞത് Symbiosis institute of International business management school Pune- യിൽ നിന്നായിരുന്നു. പഠിയ്ക്കുന്ന സമയത്ത് അദ്ദേഹം പൂനെ യൂണിവേഴ്സിറ്റിയിലെ വോളിബോൾ, അത്ലറ്റിക് ടീം ക്യാപ്റ്റനായിരുന്നു. ബാബു ആന്റണി ഒരു ചിത്രകാരൻ കൂടിയാണ്. മാർഷ്യൽ ആർട്സിൽ  Fifth Dan Black Belt നേടിയ ആളാണ് ബാബു ആന്റണി. സിനിമാട്ടോഗ്രാഫറായി കുറച്ചുകാലം പൂനെ ഫിലിം ഇൻസ്റ്റിറ്റ്യൂട്റ്റിൽ അദ്ദേഹം വർക്ക് ചെയ്തിരുന്നു. അത് സിനിമയിലേയ്ക്കുള്ള പ്രവേശനത്തിന് അദ്ദേഹത്തെ സഹായിച്ചു.

ഭരതൻ സംവിധാനം ചെയ്ത് 1986-ൽ റിലീസായ ചിലമ്പ് എന്ന സിനിമയിലൂടെയാണ് ബാബു ആന്റണി തന്റെ അഭിനയ ജീവിതത്തിന് തുടക്കമിടുന്നത്. വില്ലൻ വേഷങ്ങളിലൂടെയാണ് ബാബു ആന്റണി പ്രശസ്ഥനായത്. ആക്ഷൻ രംഗങ്ങളിലുള്ള ബാബു ആന്റണിയുടെ പ്രകടനം അദ്ദേഹത്തിന് ധാരാളം ആരാധകരെ നേടിക്കൊടുത്തു. മൂന്നാം മുറ, ദൗത്യം, വ്യൂഹം, കോട്ടയം കുഞ്ഞച്ചൻ, നാടോടി.. തുടങ്ങിയ സിനിമകളിൽ നായകനൊപ്പം നിലക്കുന്ന വില്ലനായി ബാബു ആൻറ്റണി മികച്ച പ്രകടനം കാഴ്ചവെച്ചു. മമ്മൂട്ടി,മോഹൻലാൽ,സുരേഷ്ഗോപി തുടങ്ങിയ എല്ലാ സൂപ്പർതാരങ്ങളുടെയും വില്ലനായി ബാബു ആന്റണി തൊണ്ണൂറുകളുടെ തുടക്കത്തിൽ നിറഞ്ഞു നിന്നു. 1994-ൽ ആണ് ബാബു ആന്റണി നായകനാകുന്നത്. നെപ്പോളിയൻ,ഭരണകൂടം,കടൽ,ദാദ,രാജധാനി,കമ്പോളം..എന്നീ സിനിമകളിൽ അദ്ദേഹം നായകനായി അഭിനയിച്ചു. പക്ഷേ തന്റെ നായക പദവി അധികകാലം നിലനിർത്താൻ അദ്ദേഹത്തിനായില്ല. ഏതാനും വർഷങ്ങൾ കഴിഞ്ഞപ്പോളേയ്ക്കും ബാബു ആന്റ്ണി ക്യാരക്ടർ റോളുകളിലേയ്ക്ക് മാറി. മലയാളത്തിൽ മാത്രമല്ല തമിഴ്,തെലുങ്കു സിനിമകളിലും അദ്ദേഹം അഭിനയിച്ചിട്ടുണ്ട്.

 സ്ഥിരം റോളുകളിൽ നിന്നും വ്യത്യസ്തമായ വേഷങ്ങളിലും ബാബു ആന്റണി അഭിനയിച്ചിട്ടുണ്ട്. ഭരതന്റെ വൈശാലി യിലെ ലോമപാദ മഹാരാജാവ് ബാബു ആന്റണിയുടെ മികച്ച വേഷങ്ങളിൽ ഒന്നാണ്. അപരാഹ്നം, സായാഹ്നം എന്നീ സിനിമകളിലെല്ലാം ബാബു ആന്റണി വളരെ മികച്ച പ്രകടനം കാഴ്ച്ചവെച്ചു.

ബാബു ആന്റണി വിവഹം ചെയ്തത് ഒരു റഷ്യൻ - അമേരിയ്ക്കൻ ഗേൾ ആയ Evgeniya -ആണ്.