ഹരി കുടപ്പനക്കുന്ന്
| Attachment | Size |
|---|---|
 എതിരൻ കതിരവന്റെ ശേഖരത്തിൽ നിന്ന് | 89.15 KB |
വളരെ കുറച്ചു ഗാനങ്ങള്‍ എഴുതുകയും അതില്‍ തന്നെ വിരലില്‍ എണ്ണാവുന്ന ഗാനങ്ങളുടെ ജനപ്രീതികൊണ്ട് ശ്രദ്ധേയനായ ഗാനരചയിതാവും ഇളമുറത്തമ്പുരാന്‍ എന്ന ചിത്രത്തിന്‍റെ സംവിധായകനുമാണ്‌ കുടപ്പനക്കുന്ന് ഹരി എന്നറിയപ്പെടുന്ന സി ആര്‍ ഹരികുമാര്‍. മൂന്ന് പതിറ്റാണ്ട് കാലം ദൂരദര്‍ശനില്‍ പ്രോഗ്രാം പ്രോഡ്യൂസര്‍ ആയി സേവനം അനുഷ്ടിച്ച, നിരവധി ടെലി ഫിലിമുകള്‍ സംവിധാനം ചെയ്ത അധികമാര്‍ക്കും അറിയാത്ത കര്‍മ്മവീഥി കൂടിയുണ്ട് ഹരിയ്ക്ക്. തിരുവനന്തപുരം യൂണിവേഴ്സിറ്റി കോളേജില്‍ ബിരുദാനന്തരബിരുദപഠന കാലത്ത് തന്നെ പ്രമുഖ പ്രസിദ്ധീകാരണങ്ങളില്‍ അദ്ദേഹത്തിന്‍റെ കവിതകള്‍ അച്ചടിച്ചു വരികവഴി കവി എന്ന നിലയില്‍ ചെറുപ്പത്തില്‍ തന്നെ അറിയപെട്ടിരുന്നു. വൈകാതെ ബിഎഡ് പഠനകാലത്ത്‌ 1982ല്‍ സൗഹൃദങ്ങള്‍ വഴി പ്രൊഫ. ശിവപ്രസാദ് സംവിധാനം ചെയ്ത ജലരേഖ എന്ന ചിത്രത്തില്‍ സംവിധാന സഹായിയായും ഗാനരചയിതാവായും പ്രവര്‍ത്തിയ്ക്കാന്‍ ഉള്ള അവസരം വന്നുചേര്‍ന്നു. തുടര്‍ന്ന് വന്ന വര്‍ഷങ്ങളില്‍ ഒന്നും തന്നെ സിനിമയില്‍ സജീവമാകാന്‍ വിവിധ കാരണങ്ങള്‍ കൊണ്ട് കഴിയാതെയിരുന്ന അദ്ദേഹത്തിന് 1988ല്‍ ആര്‍ സുകുമാറിന്റെ പാദമുദ്ര എന്ന ചിത്രമാണ് സിനിമാജീവിതത്തിലെ വലിയ പ്രശസ്തി നേടിക്കൊടുത്തത്. വിദ്യാധരന്‍ ഈണം നല്‍കിയ ' അമ്പലമില്ലാതെ ആല്‍ത്തറയില്‍ വാഴും..' എന്ന ഗാനം ജനഹൃദയങ്ങളില്‍ ആഴിനിറങ്ങുകയും ദേശീയപുരസ്കാരനിര്‍ണ്ണയ ചര്‍ച്ചകളില്‍ പോലും ഇടംപിടിക്കുകയും ചെയ്തു. ഈ ഗാനം റെക്കോര്‍ഡ്‌ ചെയ്ത് ഇറങ്ങിയ ഗാനഗന്ധര്‍വന്‍ യേശുദാസ് അക്കൊല്ലത്തെ തരംഗിണി അയ്യപ്പഗാന സമാഹാരത്തിന്റെ ഉത്തരവാദിത്തം ഹരിയെയും വിദ്യാധരനെയും ഏല്‍പ്പിക്കുകയും വളരെ മികച്ച സൃഷ്ടികള്‍ കൊണ്ട് ഇരുവരും അത് ഭംഗിയാക്കുകയും ചെയ്തു. ദൂരദര്‍ശനിലെ തിരക്കുകളും ഒപ്പം സിനിമാഗാനരചനയുടെ സ്ഥിരം വേഗത്തിനൊപ്പം സഞ്ചരിക്കാന്‍ ഉള്ള താല്‍പര്യക്കുറവും മൂലം സിനിമാമേഖലയില്‍ വല്ലപ്പോഴും വന്നുപോകുന്ന അതിഥി മാത്രമായി അദ്ദേഹം മാറി. രവീന്ദ്രന്‍റെ ഈണത്തില്‍ മഹസ്സര്‍ എന്ന ചിത്രത്തിന് വേണ്ടി എഴുതിയ ' ഏതോ കിളിനാദമെന്‍ കരളില്‍..' ആണ് അദ്ദേഹത്തിന്‍റെ മറ്റൊരു ശ്രദ്ധേയ ചലച്ചിത്രഗാനം. എം ജയചന്ദ്രനെ ശ്രദ്ധേയനാക്കിയ 'സ്മൃതിതന്‍ ചിറകിലേറി.. ' അടക്കം ഒരുപാട് ദൂരദര്‍ശന്‍ ലളിതഗാനങ്ങള്‍ അദ്ദേഹം രചിച്ചിട്ടുണ്ട്. ദൂരദര്‍ശനില്‍ നിന്നും വിരമിച്ച അദ്ദേഹം പുതിയൊരു ചലച്ചിത്രം സംവിധാനം ചെയ്യാനുള്ള തയ്യാറെടുപ്പിലാണ്.
