ശ്രീവിദ്യ

Name in English: 
Sreevidya

Profile photo drawing by : നന്ദൻ
ദക്ഷിണേന്ത്യൻ ചലച്ചിത്രനടി.  1953 ജൂലൈ 24-ന് ആർ. കൃഷ്ണമൂർത്തിയുടെയും പ്രശസ്തഗായിക എം.എൽ. വസന്തകുമാരിയുടേയും മകളായി തമിഴ്‌നാട്ടിലെ മദ്രാസിലാണ് (ചെന്നൈ) ശ്രീവിദ്യ ജനിച്ചത്. സമ്പന്നതയുടെ മടിത്തട്ടിലായിരുന്നു ശ്രീവിദ്യയുടെ ജനനം. ചെറുപ്പം മുതൽക്കേ സംഗീതത്തിന്റെയും നൃത്തത്തിന്റെയും ലോകത്തായിരുന്നു ശ്രീവിദ്യ വളർന്നത്. 13-ആം വയസ്സിൽ ‘തിരുവുൾ ചൊൽ‌വർ’‍ എന്ന തമിഴ് സിനിമയിലെ ചെറിയ ഒരു റോളിലൂടെയാണ് ശ്രീവിദ്യ വെള്ളിത്തിരയിലെത്തുന്നത്. 1969ല്‍ എന്‍. ശങ്കരന്‍ നായര്‍ സംവിധാനം ചെയ്ത ചട്ടമ്പിക്കവല എന്ന സിനിമയിലൂടെയാണ് ശ്രീവിദ്യയെ മലയാളസിനിമക്ക് ലഭിക്കുന്നത്. സത്യന്റെ നായികയായിട്ടായിരുന്നു ശ്രീവിദ്യയുടെ അരങ്ങേറ്റം. 1971- എ വിൻസെന്റ് സംവിധാനം ചെയ്ത ചെണ്ട എന്ന സിനിമയിൽ നായികയായത് ശ്രീവിദ്യയുടെ സിനിമാജീവിതത്തിൽ ഒരു വഴിത്തിരിവായി. തുടർന്ന് മലയാളസിനിമയിലെ മുൻ നിര നായികമാരിൽ ഒരാളായി ശ്രീവിദ്യ ഉയർന്നു. 

മലയാളത്തില്‍ പ്രമുഖ നടന്മാരുടെയെല്ലാം നായികയായി ശ്രീവിദ്യ. വെറുമൊരു നായികാവേഷം എന്നതിലുപരി അഭിനയപ്രാധാന്യമുള്ള വേഷങ്ങളായിരുന്നു അവയെല്ലാം. ആദാമിന്റെ വാരിയെല്ല്-ലെ ആലീസ് എന്റെ സൂര്യപുത്രിയ്ക്ക് എന്ന ചിത്രത്തിലെ വസുന്ധരാ ദേവി തുടങ്ങിയവ ശ്രീവിദ്യ അനശ്വരമാക്കിയ കഥാപാത്രങ്ങളാണ്. സൊല്ലത്താന്‍ നിനക്കിറേന്‍, അപൂര്‍വ്വ രാഗങ്ങള്‍ എന്നീ ചിത്രങ്ങളിലൂടെ അവര്‍ തമിഴകത്തിന്റെയും മനം കവര്‍ന്നു . കന്നഡ, തെലുങ്ക്, ഹിന്ദി ഭാഷകളിലും ശ്രീവിദ്യ അഭിനയിച്ചിട്ടുണ്ട്.  രചന, ദൈവത്തിന്റെ വികൃതികൾ, ജീവിതം ഒരു ഗാനം, ഇടവഴിയിലെ പൂച്ച മിണ്ടാപ്പൂച്ച എന്നീ ചിത്രങ്ങളിലെ അഭിനയത്തിന് മികച്ച അഭിനേത്രിക്കുള്ള സംസ്ഥാന പുരസ്കാരങ്ങളും ശ്രീവിദ്യയെ തേടിയെത്തി. മധുവിന്റെ നായികയായിട്ടാണ് ശ്രീവിദ്യ കൂടുതലും അഭിനയിച്ചിട്ടുള്ളത്. സത്യന്‍- ശാരദ, നസീര്‍- ഷീല ജോഡികള്‍ പോലെ പ്രേക്ഷകര്‍ ഇഷ്ടപ്പെട്ടിരുന്ന ജോഡിയായിരുന്നു മധു-ശ്രീവിദ് ജോഡി. ചെണ്ട,തീക്കനല്‍... തുടങ്ങിയ ചിത്രങ്ങളിലെ മധു-ശ്രീവിദ്യ കെമിസ്ട്രി ശ്രദ്ധിക്കപ്പെട്ടു. തീക്കനല്‍ എന്ന ചിത്രത്തില്‍ അഭിനയിച്ചുകൊണ്ടിരിക്കുമ്പോള്‍ അതിന്റെ നിര്‍മ്മാതാവായിരുന്ന ജോര്‍ജ്ജ് തോമസുമായി പ്രണയത്തിലായി . 1979ല്‍ ഇവര്‍ വിവാഹിതരായി.

 അമ്മ എം എൽ വസന്തകുമാരിയെപ്പോലെ ഒരു പാട്ടുകാരിയും കൂടിയായിരുന്നു ശ്രീവിദ്യ. അയലത്തെ സുന്ദരി, ഒരു പൈങ്കിളിക്കഥ, നക്ഷത്രത്താരാട്ട്.. തുടങ്ങിയ ചിത്രങ്ങളിൽ  ശ്രീവിദ്യ പാട്ടുകൾ പാടിയിട്ടുണ്ട്.  ‘ഒരു പൈങ്കിളിക്കഥയിലെ’ “ആനകൊടുത്താലും കിളിയേ.. എന്നെ ഗാനം ശ്രീവിദ്യ ആലപിച്ച ഗാനങ്ങളിൽ വെച്ച് ഏറ്റവും ജനപ്രിയമായഗാനമായിരുന്നു. സിനിമകൾ കൂടാതെ ടെലിവിഷൻ സീരിയലുകളിലും ശ്രീവിദ്യ അഭിനയിച്ചിട്ടുണ്ട്. 2004-ൽ അവിചാരിതം എന്ന പരമ്പരയിലെ അഭിനയത്തിന് മികച്ചനടിയ്ക്കുള്ള സംസ്ഥാന ടെലിവിഷൻ അവാർഡ് ശ്രീവിദ്യക്ക് ലഭിച്ചിട്ടുണ്ട്.

1979-ൽ വിവാഹിതയായ ശ്രീവിദ്യ 1999-ൽ വിവാഹ മോചിതയായി. 2006-ൽ കാൻസർ ബാധിച്ച് ശ്രീവിദ്യ അന്തരിച്ചു.