റ്റി ഡി ദാസൻ സ്റ്റാൻ‌ഡേർഡ് VI ബി

കേരളത്തിലെ ഒരു കൊച്ചുഗ്രാമത്തിൽ തൻ്റെ അമ്മയ്ക്കൊപ്പം കഴിയുന്ന കുട്ടിയാണ് റ്റി ഡി ദാസൻ. ദാസൻ്റെ അച്ഛൻ, അവന് ഒരു വയസ്സുള്ളപ്പോൾ നാട് വിട്ടു പോയതാണ്. പിന്നീട് അയാളെക്കുറിച്ച് ഒരു വിവരവും അവർക്കില്ല. അങ്ങനെയിരിക്കെ, അമ്മയുടെ ട്രങ്ക് പെട്ടിയിൽ നിന്നും അച്ഛൻ്റെ മേൽവിലാസം ദാസന് ലഭിക്കുന്നു. ബാംഗ്ലൂരിലുള്ള ആ വിലാസത്തിലേക്ക് ഒരു കത്തയച്ചു നോക്കാൻ ദാസൻ തീരുമാനിക്കുന്നു.

ദാസന് ലഭിച്ച മേൽവിലാസത്തിലുള്ള വീട്ടിൽ നിന്നും അവൻ്റെ അച്ഛൻ താമസം മാറിയിരുന്നു. ഇപ്പോൾ അവിടെ താമസിക്കുന്നത് നന്ദകുമാർ പൊതുവാൾ എന്ന പരസ്യ സംവിധായകനും അയാളുടെ മകളായ അമ്മുവുമാണ് ദാസൻ അയച്ച കത്ത് അയാൾക്ക് കിട്ടുന്നു. കത്ത് വായിച്ച നന്ദൻ തന്റെ മകളുടെ കാര്യങ്ങൾ നോക്കുന്ന മാധവനോട് കത്തിലെ കാര്യങ്ങളെക്കുറിച്ച് അന്വേഷിക്കാനാവശ്യപ്പെടുന്നു. എന്നാൽ, അക്കാര്യത്തിൽ വലിയ താത്പര്യം കാണിക്കാതെ ചവറ്റു കുട്ടയിൽ വലിച്ചെറിയുന്നു. ഇത് കാണുന്ന അമ്മുവിന് വലിയ വിഷമം തോന്നുന്നു. കത്ത് വായിച്ച് നോക്കുന്ന അമ്മു, ദാസൻ്റെ അച്ഛൻ എന്ന പോലെ അതിന് മറുപടി അയയ്ക്കുന്നു.

മറുപടി കത്ത് കിട്ടിയ ദാസന് വലിയ സന്തോഷമാകുന്നു. നഷ്ടപ്പെട്ടു എന്ന് കരുതിയ തൻറെ അച്ഛനെ തിരിച്ച് കിട്ടിയതായി അവൻ കരുതുന്നു. പക്ഷേ, ഇക്കാര്യം അമ്മയോട് പറയാതെ അവൻ രഹസ്യമായി വയ്ക്കുന്നു. പിന്നീടും പല കത്തുകൾ അവൻ ആ വിലാസത്തിലയയ്ക്കുന്നു. തൻ്റെ വിഷമങ്ങളും ആഗ്രഹങ്ങളുമെല്ലാം ആ കത്തുകളിലൂടെ അവൻ അച്ഛനെ അറിയിക്കുന്നു. അമ്മുവാകട്ടെ, ഇതിനെല്ലാം ദാസൻ്റെ അച്ഛൻ എഴുതുന്നത് പോലെ മറുപടികളും അയയ്ക്കുന്നു. ഇടയ്ക്ക് ദാസൻ ആവശ്യപ്പെടുന്ന പല സമ്മാനങ്ങളും അതിനൊപ്പം അവൾ അയച്ചുകൊടുക്കുന്നുണ്ട്.

ദാസൻ്റെ ഈ കത്തിടപാട് അവൻ്റെ അമ്മ അറിയുകയും അവനെ അതിൻ്റെ പേരിൽ വഴക്ക് പറയുകയും ചെയ്യുന്നു. ഇതിനിടെ, ദാസൻ്റെ അച്ഛൻ മഞ്ഞപ്പിത്തം മൂലം മരിച്ച് പോയി എന്ന സത്യം നന്ദൻ മനസിലാക്കുന്നു. അപ്പോഴാണ് അമ്മു ഇത്തരത്തിൽ കത്തയയ്ക്കുന്നുണ്ട് എന്ന വിവരം അയാൾ അറിയുന്നത്. വല്ലാത്ത വിഷമം തോന്നുന്ന അയാൾ നാട്ടിൽ ചെന്ന് ദാസനോട് മാപ്പു പറയാൻ തീരുമാനിക്കുന്നു. ഇതിനിടെ, പെട്ടെന്നൊരു ദിവസം ദാസൻ്റെ അമ്മയെ മരിച്ച നിലയിൽ കാണപ്പെടുന്നു.

നാട്ടിലെത്തുന്ന നന്ദൻ കാണുന്നത്  അമ്മാവനൊപ്പം താമസിക്കുന്ന ദാസനെയാണ്. ദാസൻ നന്ദനെ തൻ്റെ അച്ഛൻ എന്നു തെറ്റിദ്ധരിക്കുന്നു. ഈ സന്ദർഭത്തിൽ വന്ന കാര്യം പറയണോ വേണ്ടയോ എന്നറിയാതെ നന്ദൻ ആശയക്കുഴപ്പത്തിലാകുന്നു