ജി കെ പള്ളത്ത്

തൃശൂർ പള്ളത്തുവീട്ടിൽ നാരായണൻനായരുടെയും അമ്മിണിയമ്മയുടെയും മകനാണ്, ഗോവിന്ദൻകുട്ടിയെന്ന ജി.കെ.പള്ളത്ത്.കുട്ടിക്കാലം മുതലേ സാഹിത്യത്തിനോടായിരുന്നു താൽപ്പര്യം. ഏഴാംക്ലാസ്സ്മുതൽ കവിതകൾ എഴുതിത്തുടങ്ങി. എട്ടാംക്ലാസ്സിൽപഠിക്കുമ്പോൾ ആനുകാലിക പ്രസിദ്ധീകരണങ്ങളിൽ ജി.കെ.യുടെകവിതകൾ അച്ചടിച്ചുവന്നു..1958 -ൽ തൃശൂരിൽ നടന്ന കമ്മ്യൂണിസ്റ്റുപാർട്ടി പ്ലീനത്തിൽ അവതരിപ്പിക്കാൻ വേണ്ടിയാണ് ജി.കെ.പള്ളത്ത് ആദ്യ ഗാനമെഴുതിയത്. കെ.എസ്.ജോർജും സുലോചനയും ചേർന്നാലപിച്ച  "രക്തത്തിരകൾ നീന്തിവരും"എന്ന ഗാനം ചിട്ടപ്പെടുത്തിയത് ദാസ് കോട്ടപ്പുറമായിരുന്നു. പിന്നീട് അമച്വർ നാടകങ്ങൾക്കും ബാലെകൾക്കും ഗാനങ്ങളെഴുതിക്കൊണ്ട് അദ്ധേഹം കലാരംഗത്തേക്ക് കടന്നു...

തുടർന്ന്,നാടകരചനയിലേക്ക് ശ്രദ്ധതിരിച്ച ജി.കെ.പള്ളത്ത് ധൂർത്തുപുത്രി, കുടുംബവിളക്ക്, തുടങ്ങിയ അമേച്വർ നാടകങ്ങളെഴുതി. അവ വലിയ വിജയങ്ങളായതോടെ പ്രൊഫഷണൽ രംഗത്തേക്ക് തിരിഞ്ഞു.എൽ.പി.ആർ.വർമ്മ, എം.കെ.അർജ്‌ജുനൻ, കോട്ടയം ജോയി തുടങ്ങിയവരുടെ സംഗീതത്തിൽ അനേകം നാടകങ്ങൾക്കുവേണ്ടി അദ്ദേഹം ഗാനങ്ങളെഴുതി.നടനും സുഹൃത്തുമായ ടി.ജി.രവിയാണ് പാദസരം എന്ന ചിത്രത്തിലൂടെ അദ്ധേഹത്തിന്‌ സിനിമയിൽ അവസരംനൽകിയത്. തുടർന്ന് ഒരുപിടി ഹിറ്റ്‌ ഗാനങ്ങൾ അദ്ദേഹം മലയാളത്തിന് സമ്മാനിച്ചു.സിനിമാഗാനങ്ങൾ കൂടാതെ ചിങ്ങനിലാവ്‌, മനസ്സിലെ ശാരിക, മാരനെക്കാത്ത്‌, വെഞ്ചാമരം  തുടങ്ങി അനേകം ആൽബങ്ങൾക്കും ജി.കെ.പള്ളത്ത് പാട്ടുകളെഴുതിയിട്ടുണ്ട്. ആകാശവാണിക്കുവേണ്ടി  അനേകം ലളിതഗാനങ്ങളും, കക്ഷി ഭേദമന്യേ എല്ലാ പാർട്ടികൾക്കും വേണ്ടി തിരഞ്ഞെടുപ്പ് പ്രചാരണ ഗാനങ്ങളും അദ്ധേഹം എഴുതിയിട്ടുണ്ട്. നിരവധി ഹിന്ദു -ക്രിസ്തീയ-മുസ്ലീം  ഭക്തിഗാനങ്ങളും പള്ളത്തിന്റേതായുണ്ട്‌. ഏറ്റവും അവസാനം പുറത്തിറങ്ങിയ ഭക്തിഗാനം തൃശ്ശൂർ കോട്ടപ്പുറം തേവരെക്കുറിച്ചുള്ള സ്വയംഭൂനാഥൻ എന്ന ഗാനമാണ്. 2024 ഏപ്രിൽ 6 -ന് ജി  കെ പള്ളത്തിന്റെ തിരഞ്ഞെടുത്ത ചില ചലച്ചിത്രഗാനങ്ങളും, ലളിതഗാനങ്ങളും, കവിതകളും, ഭക്തിഗാനങ്ങളും, നാടകഗാനങ്ങളുമുൾപ്പെട്ട "ഗാനാർച്ചന" എന്ന പുസ്തകത്തിന്റെ പ്രകാശനം  തൃശ്ശൂർ റീജിണൽ തിയ്യറ്ററിൽ വെച്ച് നടന്നു. 
ജി കെ പള്ളത്ത് രചിച്ച ഭൂരിഭാഗം ചലച്ചിത്ര ഗാനങ്ങൾക്കും സംഗീതം നല്കിയത് ദേവരാജൻ മാസ്റ്ററാണ്. പിൽക്കാലത്ത് സംഗീതസംവിധായകൻ ടി.കെ.ലായനുമായി ചേർന്ന് അനേകം ചിത്രങ്ങൾക്കും അദ്ധേഹം പാട്ടുകളെഴുതി.