നൻപകൽ നേരത്ത് മയക്കം

തീർത്ഥാടനത്തിനായി വേളാങ്കണ്ണിയിലെത്തിയ മലയാളി സംഘം മടക്കയാത്രയ്ക്കുള്ള ഒരുക്കത്തിലാണ്. ഒരു നാടക സംഘത്തിലെ അംഗങ്ങളാണവർ എന്ന് അവരുടെ സംസാരത്തിലൂടെ മനസ്സിലാകുന്നു. ബാക്കിയെല്ലാവരും വണ്ടിയിൽ കയറിയിട്ടും ജെയിംസും കുടുംബവും മാത്രം എത്തുന്നില്ല. യാത്രയിലെ ചെലവു സംബന്ധിച്ച കണക്കുകളും മറ്റും കൈകാര്യം ചെയ്യുന്നത് ജെയിംസാണ്.  തിരിച്ചു നാട്ടിലെത്താൻ തിടുക്കമുള്ള ബാബുക്കുട്ടിയെ ജെയിംസിൻ്റെ ഈ അമാന്തം അസ്വസ്ഥനാക്കുന്നുണ്ട്. ഒടുവിൽ ലോഡ്ജിൻ്റെ കണക്കു തീർത്ത് ജെയിംസ് എത്തുന്നതോടെ മടക്കയാത്ര ആരംഭിക്കുന്നു.

ഒരല്പം ഗൗരവം നിറഞ്ഞ പ്രകൃതമാണ് ജെയിംസിൻ്റേത്. യാത്രയ്ക്കിടെയിലുള്ള പാട്ടും ആഘോഷവും ഒന്നും ആയാൾക്കിഷ്ടപ്പെടുന്നില്ല,കൂട്ടുകാരുടെ മദ്യപാന സദസിൽ അയാൾ കൂട്ടുചേരുന്നില്ല. മൊത്തത്തിൽ ഒരരസികൻ എന്ന് തോന്നിക്കുന്ന പെരുമാറ്റമാണയാളുടേത്. 

വഴിയിലെ ഹോട്ടലിൽ നിന്നും ഉച്ചഭക്ഷണം കഴിച്ച ശേഷം യാത്ര തുടരുന്ന സംഘം മയക്കത്തിലേക്ക് വഴുതി വീഴുന്നു. വണ്ടി തമിഴ്നാട്ടിലെ ഒരു ഉൾനാടൻ ഗ്രാമപ്രദേശത്തെത്തുന്ന സമയത്ത് ജെയിംസ് മയക്കം വിട്ടെഴുന്നേൽക്കുകയും വണ്ടി നിർത്താൻ ആവശ്യപ്പെടുകയും ചെയ്യുന്നു. 

വണ്ടിയിൽ നിന്നിറങ്ങി നടക്കുന്ന ജെയിംസ് ഏറെ നേരമായിട്ടും തിരിച്ചെത്താത്തത് മറ്റുള്ളവരെ അസ്വസ്ഥരാക്കുന്നു. വണ്ടിയിൽ നിന്നിറങ്ങി ജെയിംസ് നേരെ നടന്നത് ഗ്രാമത്തിനകത്തെ ഒരു വീട് ലക്ഷ്യമാക്കിയാണ്. രണ്ട് വർഷം മുമ്പ് നാട്ടിൽ നിന്നും കാണാതായ സുന്ദരത്തിൻ്റെ വീടാണത്. വീട്ടിലെത്തുന്ന ജെയിംസ് അത് തനിക്ക് ചിരപരിചിതമായ സ്ഥലം എന്ന പോലെ പെരുമാറുന്നു. കാണാതായ സുന്ദരമാണ് താൻ എന്ന മട്ടിലാണയാൾ വീട്ടിലുള്ളവരോടിടപെടുന്നത്. എടുപ്പിലും നടപ്പിലും അയാൾ സുന്ദരമായി മാറുകയാണ്.
അപരിചിതനായ ഒരു വ്യക്തി പെട്ടെന്ന് വീട്ടിൽ വന്ന് തന്റെ ഭർത്താവിനെപ്പോലെ പെരുമാറുന്നത് കണ്ട് സുന്ദരത്തിൻ്റെ ഭാര്യ എന്തു ചെയ്യണമെന്നറിയാതെ നിൽക്കുന്നു. വീട്ടിൽ നിന്നും സുന്ദരത്തിൻ്റെ സ്കൂട്ടറുമെടുത്തിറങ്ങുന്ന ജെയിംസ് സുന്ദരത്തിൻ്റെ ദിനചര്യകളെല്ലാം കൃത്യമായി പിന്തുടരുന്നു. നന്നായി തമിഴ് സംസാരിക്കുന്നു, പച്ചക്കറി നോക്കാൻ തോട്ടത്തിൽ പോകുന്നു, ചായക്കടയിൽ കയറി ചായ കുടിച്ച് നാട്ടുകാരോട് കഥപറയുകയും പാടുകയും ആടുകയും ചെയ്യുന്നു. സന്ധ്യക്ക് മദ്യഷാപ്പിൽ കയറി പഴയ തമിഴ് സിനിമയിലെ രംഗങ്ങൾ അത് പോലെ അഭിനയിച്ച് കാണിക്കുന്നു. അങ്ങനെ ജെയിംസിന് പരിചിതമല്ലാത്തതും എന്നാൽ സുന്ദരം സ്ഥിരമായി ചെയ്യുന്നതുമായ കാര്യങ്ങൾ അയാൾ ചെയ്യുന്നു. അപ്രതീക്ഷിതമായുണ്ടായ ഈ സംഭവ വികാസങ്ങൾ നാട്ടുകാരിലും അമ്പരപ്പുണ്ടാക്കുന്നു.

അപ്പോഴേക്കും അവിടെയെത്തുന്ന നാടക സംഘം ഇനിയെന്ത് ചെയ്യണമെന്നറിയാതെ കുഴങ്ങുന്നു. രാത്രിയിൽ വീട്ടിൽ നിന്നും ജെയിംസിനെ കൊണ്ട് പോകാനുള്ള ശ്രമത്തെ അയാൾ ശക്തമായി പ്രതിരോധിക്കുന്നു. താനീ നാട്ടുകാരനാണെന്നും വേറെ ഒരു സ്ഥലത്തേക്കും പോകുകയില്ലെന്നും അയാൾ ഉറപ്പിച്ച് പറയുന്നു. ആ നാട്ടുകാരാരും തന്നെ അപ്പോൾ സഹായിക്കാത്തതിൽ അയാൾ പരിഭവം പറയുന്നു.

പിറ്റേന്ന് രാവിലെ പാൽ വിൽക്കാൻ പോകുന്ന ജെയിംസ്, പാൽ ആരും വാങ്ങാത്തത് കണ്ട് അമ്പരക്കുന്നു. സ്ഥിരമായി കാണുന്ന ചായക്കടക്കാരനുൾപ്പടെ ആരും തന്നെ തിരിച്ചറിയുന്നില്ല എന്നയാൾ മനസിലാക്കുന്നു. പല കാര്യങ്ങളിലും അയാൾക്ക് ആശയക്കുഴപ്പം ഉണ്ടാകുന്നു. പൊന്തക്കാടായി കിടന്നിരുന്ന സ്ഥലത്ത് പെട്ടെന്നൊരമ്പലം ഉയർന്ന് പൊങ്ങിയിരിക്കുന്നു, സ്ഥിരമായി തൻ്റെ മുടി വെട്ടിയിരുന്ന മലൈച്ചാമി മരിച്ചിട്ട് ആറു മാസം കഴിഞ്ഞിരിക്കുന്നു. എവിടെയോ എന്തോ കുഴപ്പമുണ്ടെന്നയാൾക്ക് തോന്നുന്നു. 
ഇതിനിടെ ജെയിംസിന് ഉറക്കഗുളിക നൽകി മയക്കി അവിടെ നിന്ന് കൊണ്ടു പോകാൻ സഹയാത്രികർ പദ്ധതിയിടുന്നു. ഭക്ഷണത്തിന് ശേഷം ഉറങ്ങിയെഴുന്നേറ്റ് കുടിക്കുന്ന ചായയിൽ മരുന്നു ചേർത്ത് കൊടുക്കാമെന്ന് തീരുമാനിക്കുന്നു. ഭക്ഷണം കഴിക്കാനെത്തുന്ന ജെയിംസിനോട് സുന്ദരത്തിൻ്റെ സഹോദരൻ മോശമായി സംസാരിക്കുന്നു. ഇതോടു കൂടി വല്ലാത്ത ഒരു അസ്തിത്വ പ്രതിസന്ധിയെ ജെയിംസ് അഭിമുഖീകരിക്കുന്നു.