അംബിക

തെന്നിന്ത്യൻ ചലച്ചിത്ര താരം.  തിരുവനന്തപുരം ജില്ലയിലെ കല്ലറ ഗ്രാമത്തിൽ കുഞ്ഞൻ നായരുടെയും സരസമ്മയുടെയും മകളായി 1963 ആഗസ്ത് പതിനാറിനു ജനനം. ബാലതാരമായി അരങ്ങേറ്റം കുറിച്ച അംബികയുടെ ആദ്യചിത്രമാണ് ചോറ്റാനിക്കര അമ്മ. വിടരുന്നമൊട്ടുകൾ അടക്കം ആറ് സിനിമകളിൽ ബാലതാരമായി അഭിനയിച്ചു. സീത എന്ന ചിത്രത്തിലൂടെയാണ് അംബിക ആദ്യമായി നായികാവേഷത്തിലഭിനയിക്കുന്നത്. സീത റിലീസ് ആകാൻ വൈകിയെങ്കിലും, നീലത്താമര, ലജ്ജാവതി പോലുള്ള ചിത്രങ്ങളിൽ അഭിനയിച്ചതോടെ അംബിക തിരക്കുള്ള ഒരു നടിയായി മാറി.

മലയാളത്തിൽ മാത്രമല്ല തമിഴിലും തെലുങ്കിലും കന്നഡയിലും അംബിക തന്റെപ്രതിഭ തെളിയിച്ചിട്ടുണ്ട്. എൺപതുകളിലെ ഒട്ടുമിക്ക ദക്ഷീണേന്ത്യൻ മുൻനിരനായകൻമാരുടെയും, പ്രേംനസീർ, ജയൻ, മമ്മൂട്ടി, മോഹൻലാൽ, രജനീകാന്ത്, കമലഹാസൻ, ചിരൻഞ്ജീവി, വിഷ്ണുവർദ്ധൻ..തുടങ്ങിയവരുടെയെല്ലാം നായികയായി അഭിനയിച്ചിട്ടുണ്ട്. ധാരാളം ബോൾഡായ കഥാപാത്രങ്ങളെ അവതരിപ്പിച്ച  അംബിക, ഗ്ലാമർ റോളുകളും ചെയ്തിട്ടുണ്ട്. വിവിധ ഭാഷകളിലായി ഏതാണ്ട് മുന്നൂറോളം സിനിമകളിൽ അഭിനയിച്ചിട്ടുണ്ട്. അയിത്തം എന്ന സിനിമയുടെ നിർമ്മാതാവു കൂടിയാണ്. 2014 ൽ ഒരു മലയാള ചലച്ചിത്രത്തിനു പാട്ടെഴുതുകയും ചെയ്തു. "എ ആർ എസ്" എന്ന സ്റ്റുഡിയോയുടെ ഉടമകൂടിയാണ് അംബിക. ടെലിവിഷൻ സീരിയലുകളിലും അംബിക അഭിനയിച്ചിട്ടുണ്ട്.

1988 ൽ ഷിനു ജോൺ എന്നയാളെ വിവാഹംചെയ്തു. അതിൽ രണ്ടുകുട്ടികൾ ഉണ്ട്. 1997ൽ വിവാഹമോചിതയായ അംബിക 2000 ത്തിൽ രവികാന്ത് എന്ന നടനെ വിവാഹം കഴിക്കുകയും 2002 ൽ അവർ പിരിയുകയും ചെയ്തു. അംബികയുടെ സഹോദരി രാധയും പ്രശസ്ത നടിയാണ്.